السويس

قال ايه يا سيدي ماما نفسها تعيش على طول في السويس بس انا طبعا قلتلها ماينفعش. البيت اللي في السويس جدي الله يرحمه جابوا بخمسميت جنيه، من دورين و على البحر على طول في قريه سياحيه اسمها انقرض بس كانوا بيمثلوا فيها افلام زمان ايام عماد حمدي و هند رستم حبيبة قلبي. بس القريه حالها اتدهور جدا بسبب مشاكل قديمه كده. المهم ان البحر ممكن اطلع فيه ٥ حاجات تخلي اي بني ادم عاقل ماينزلوش بس انا كل يوم كنت انزل و اغوط جوه خالص لدرجة ان ساعات ما كانوش بيشوفوني و كنت كل يوم اقول لا يمكن انزل البحر ده تاني ابدا و اصحى تاني و يوم و يجيلي هرش ويذدرووال لحد ما انزل و بصراحه متعه مفيش بعدها متعه ان الواحد ينزل البحر و يسيب الميه تشيلو الناس دايما بتقول كان نفسي اطير و هم مش مقدرين جمال ان الواحد يتحدى الجاذبيه و يعوم و يعوم. انا على فكره كنت لوحدي في الميه ال٥ ايام اللي نزلتهم وحدي يعني لوحدي و ده كان مخلي الموضوع رائع بطريقة لا توصف مكانش فيه غير كام واحد كده غاروا مني و قالوا اشمعنى هو ينزل في الميه التلج و احنا لا المهم ماكانوش بينزلوا اكتر من عشر دقائق قبل ما يطلعوا جري يتكتكوا. انا بصراحه كنت بستحمل السقوعيه عشان الدهون اللي في و برده الدهون كانت بتخليني طافي بسلاسه رهيبه مكنتش بحتاج ابدل او اي حاجه عشان اطفو. كنت بتفرج على قناة الموضه و البنت بتقول ان احلى حاجه ان الشاطئ ما يكونش فيه غيرها بس. كانت تيجي تشوف. و عشان نختمها بفاصل رعب بقى الله يحرق الغربان و فيلم الطيور بتاع هتشكوك في يوم واحد انا كنت ببقى بعيد من الشط بتاع ربع كيلو و الاقيلك يا بيه غراب جي يلف حواليه و على ارتفاع منخفض، اقول مش مشكله غراب و بيتفسح, اغمض و افتح و الاقيهم بقوا اربعه و بغتتة معرفش ازاي الاقيهم بقوا بتاع خمستاشر عشرين واحد و على فكره صوت اجنحتهم من قريب و هما بيلفوا حواليه مرعب جدا، اول مره حصلت طلعت جري و بعد كده بقيت اعوم و اطرطش ميه جامد عشان كل واحد فيهم يفهم ان اللي هيقرب هشويه بس طبعا ربنا اللي كان بيستر في الاخر و الحمد لله اني رجعت قطعه واحده.